Voice Of Salvationist 2026 finalist hriat ta

Voice of Salvationist 2026 thlanna neih mekah final lut mi pangate hriat an ni ta. August 20 zan dar 8:00 khan Youth Multipurpose Center, Ainawn Vengah Top 10 intihsiakna neih a ni a, hla hnih hmangin an inel a ni. Sound track hmangin an hla duh ber pakhat an sak bakah, battle round neih a ni. Contestant-te hi pahnih te tea siam rem an ni a, live music hmangin an intihsiak a ni.

VOS 2026 hi Salvation Army ṭhalai member-te tana zai hmanga rawngbawltu tur zawnna niin, Division tina audition neih a nih hnuah August 1 aṭang khan Jubilee hall, Bethlehem Corps-ah intihsiakna an nei a ni. Top 50 thlan a nih hnuah Top 30 thlan leh a ni a, hemi hnuah top 10 thlan leh a ni. Top 10 aṭang hian YMC, Ainawn Vengah intihsiakna neih leh niin, Final hi August 24 zanah neih a ni dawn a, Grand Finale hi August 27-ah neih tur niin lawmman sem nghal a ni ang. Programme hi Zonet-ah leh TSAY IET YouTube channel-ah pek chhuah a ni.