Lehkhabu bawm : 'USA Leh Unaute' lehkhabu tlangzarh

Vanneihtluanga lehkhabu ziah, 'USA leh Unaute' tih chu PL Liandinga'n August 21 khan Khatlaa BSI Hall-ah a tlangzarh. Tlangzarh inkhawm hi R. Lalhmangaiha'n a kaihruai a, Rev Dr. H. Vanlalruata'n hunserh a hmang. Lalmuansanga Ralte chuan lehkhabu tlangzarh sawi hawnna hun a nei a ni.

Lehkhabu tlangzarhtu, PL Liandinga chuan khawvel ram ropui America chu miin an hmu chak a, an kal sup sup a, he lehkhabu ziaktu pawh hi kal vein, mi hmuh ang hmu tho mah se, mi ngaihtuah bak ngaihtuah mi a nih tlat avangin he lehkhabu hi a hlu hle a ni, a ti. Mi tam tak angin thil ropui awmsate en ngawt loa, chung a thil hmuh aṭangte chuan hnam tan eng nge a hawn ve ang tih chu a ngaihtuah tih a hriat theih a ni, a ti bawk. 'USA leh Unaute' tih hi phek 500 niin, Rs. 500 man a ni.