Alex Warren-a'n Auckland show cancel

American singer-songwriter leh YouTuber, Alex Warren chuan nimin August 24-a Auckland-a Spark Arena-a show a neih tur chu damlohnain a tlakbuak avangin a cancel. Warren hian Road World Tour 'Finding Family' tih chu New Zealand-ah a nei mek a ni.

Warren chuan a Instagram-ah thuchhuah siamin, show cancel a ni chu pawi a tih thu a tarlang. Show hlawhtling taka neih a nih theihna turin theihtawp a chhuah thu pawh a sawi bawk. Tun dinhmunah a aw lamah harsatna a tawh avangin a zai theih loh thu a sawi a, concert chhim tura hmun hla tak tak aṭanga rawn kalte chungah thupha a chawi nghal bawk.

Show cancel a nih thu hi promoter, Frontier Touring chuan puangin, Alex hian Auckland-a a fan-te tan a perform leh thuai tur thu leh, ticket lei tawhte pawh automatic-in refund an ni dawn tih an sawi. Warren hian bronchitis leh laryngitis natna neiin, nikum pawh khan Philadelphia leh Montreal-a show a neih tur a lo cancel tawh a, tunah hian a dinhmunin zual lam a pan nia sawi a ni. Warren hi August 28 hian Sydney-a Qudos Bank Arena-a perform tura tih a ni a, Australia-ah Brisbane, Melbourne, Adelaide leh Perth-te a la hmabak a ni.