Vanglaini Bihchianna : Tuma Ecoguard Solutions
Mizorama mau sawngbawl hmanga product hrang hrang siam chhuaktu, Tuma Ecoguard Solutions chu Vanglaini chuan a bihchiang a.
Bul ṭan dan: Tuma Ecoguard Solutions hian rampawn aṭanga la lut loa raw material kan neih ṭhat ve ber, mau hman ṭangkai duhna neiin kum 2024 aṭang khan Sairang a Bamboo Technology Park-ah sorkar building an luah bakah khawl an hawh hmangin, Bamboo round stick siamin bul an ṭan a ni. An product zinga 'Thosi hlo' tih chu nikum aṭang khan Central Womens Jail-ah Bamboo Development Agency puihnain an siam ṭan bawk a ni.
Hmalakna: Bamboo round stick chauh siam a bul ṭan an nih avangin bamboo round stick chu ramchhunga incense stick siam company lian ber pawl, Mysore Deep Perfumery House (Zed Black Incense) hnenah an hralh ṭhin a, tun thlengin Zed Black-ah hian supply tluang takin an la pe chhunzawm zel thei a ni. Round stick chauh hralh chhuah chu an hralhna rate-te company-in an control ṭhin avangin incense stick chu man tlawm zawka hralh chhuah turin BDA-te puihnain bul an ṭan ta a ni. Mizorama mi nawlpui in incense stick kan chhit ve ngai lem loh avangin 'Thosi hlo' siamin bul an ṭan a, room tih rimtuina Mizo duh zawngte pawh siam tumin hma an la chho zel a ni. Hei bakah mau aṭanga siam chhuah theih, toothpick-te pawh siam tumin BDA puihnain hma an la mek bawk.
Hnathawktu: Tun dinhmunah Sairang a an factory-ah hnathawk mi 26 an awm mek a, Central Womens Jail lamah hnathawk mi 10 vel an nei bawk a ni.
Harsatna: Tuma Ecoguard Solutions hian bul an ṭan aṭangin harsatna an tawk nual a, experience neilo aṭanga bul ṭan an nih avangin inzir chhungte a rei bakah mau lei dan tur, an tana a hlawk dan turte thlengin rilru an seng nasa hle. Hei bakah khawl khawih thiam an neih mai loh avangin mau sawngbawlna khawl chu nitin maintenance neih a ngai ṭhin a, inzir chawpin an khawih ṭhin a ni. Mau processing chu zir nasat ngai tak niin, rua khawih dan leh mautak khawih dan tur thlengin a in ang lo a, mumal takin an zir chho ve zel a ni. Hei mai bakah incense stick chu mm 1.3 chauh a ni a, paih tur a tam avangin a waste product hman ṭangkaina an zawn kawngah, bamboo charcoal-te siamin, biochar pawh siam tumin an inbuatsaih mek bawk. Electric supply mumal lo chu harsatna an tawh lianber a ni bawk a, a bikin fur laiin current awm loh a tam avangin zanah an thawh a ngai ṭhin tih Vanglaini an hrilh.
Thurawn: Sumdawnna reng rengah hlawk thutna a awm lo a, zirchian peihna leh tei rei peihna neih a pawimawh a, tawnhriat nei tawh zawkte hnen aṭanga thurawn lak thiamte leh hmachhawp insiam a kan thlen chin apianga hmasawn tum zel hi a pawimawh em em bawk a ni, tiin Tuma Ecoguard Solutions chuan Vanglaini an hrilh a ni.