Roonie (The Prophets) ft. Booma

The Prophets vocalist Ronnie Lalrinmawia leh Sound From the Hills/Boomarang guitarist Brian Hs Lalruatliana (Booma)-te chuan project 'Kalvaria Krista' an tichhuak dawn a, zanin hian Zonet lamah thlira ngaihthlak theihin a 

awm dawn.

Kalvaria Krista hi sap hla aṭanga lehlin niin Nathan Atkinson Aldersley hla phuah 'The Christ of Calvary' Mizo ṭawnga lehlin a ni a, JK Dawngzuala lehlin a ni.Music video chu Kevin Hangsing kut chhuak niin Boom-a hian music a siam bakah a produce nghal bawk a, ngaihthlak a manhla viau ang.

'Kalvaria Krista' hi Salvation Army zaipawl lam chuan an sa fo tawh ṭhin a, solo-a mumal taka tichhuak erawh an la awm lo mai thei. A hla thluk hi 'Annie Laurie' niin Mizo zingah chuan hla thluk mikhual tak a ni lem lo! Fam ta Dura Chawngthu hla phuah Vanlalruati'n thiam taka a sak ṭhin 'Tleitira Tleitiri' thluk kha a ni a, kan hre fur tawhin a rinawm.

Good Friday hla a ni a, Kalvaria Krista hming aia mawi hming dang a awm loh thu tarlanna hla a ni. Roonie chuan,"Booma nen hian kohhran khata lawi kan nih avangin kan inhriatna a rei tawh hle. Mahse kan la thawk dun ngai lo a, music genre hrang ve veah kalin rimawi kan la siam dun ngai lo. Tunah erawh kan han thawk dun ta a, tun hi kan project pakhatna chauh a la ni a, album-te hial pawh siam kan tum a ni," tiin Boom-a nena an thawhdun chungchang hi Vanglaini a hrilh. Anni pahnih thawhdunna album hi kan la ngaithla dawn a nih hmel a, nghakhlel fe fe an tam hle ang.