Dr. Dre damdawi-in aṭangin a chhuak tawh

Brain aneurysm vanga damdawi-in lama enkawl Hip Hop icon Dr. Dre chu damdawi-in aṭangin a chhuak tawh a, in lamah enkawl chhunzawm a ni.

Dr. Dre attorney Peter Paterno chuan hemi chungchang hi Inrinni khan sawi chiangin, Zirtawpni liam ta khan rapper Ice-T pawhin a lo tweet tawh bawk a ni. Ice-T hian Dr. Dre damdawi-in aṭanga a chhuah thu leh facetime hmanga an inbiak thute a tarlang a, a dinhmun a ṭhat hmel hle tih a sawi tel bawk.

Rapper Dr Dre hi January 5 khan brain aneurysm vangin Los Angeles-a Cedars-Sinai Medical Center-ah dah luh a ni a, hemi hnu lawk hian a aiawhin a team-te chuan thuchhuah siamin damdawi-in aṭanga a chhuah leh thuai dawn thu leh ṭha taka enkawl a nih thu an tarlang nghal. Mahse kar hmasa tir lam thleng pawh khan ICU-ah uluk taka enkawl a la ni a, tunah erawh Dr.Dre fan-te tana thu lawmawm hriat tur a awm leh ta a ni.