Nakkum October-ah Matthew Perry docuseries

American leh Canadian actor, NBC TV series 'Friends' hmanga kan hriat lar, kum 2023 October 28-a thi ta, Matthew Perry docuseries part thum awmna, 'The One About Matthew Perry' tih chu Netflix-ah nakkum October 27 hian tlangzarh a ni dawn. Perry-a farnu Mia Perry Bowick chu he series siam kawngah hian mi pawimawh tak niin, Perry family archive-a thlalak leh video la tlangzarh lohte pawh en theih a ni ang.

Series-ah hian Perry hi comedic star a nih chhoh dante leh, mite ngainat a nih chhunzawm zel dan tarlan a ni ang. Hei bakah a mimal chanchin leh harsatna a tawhte pawh tarlan a ni dawn bawk. Series-ah hian 'Friends' a a chanpuite an inlan dawn leh dawn loh hriat a la ni loa, mahse Netflix chuan project-ah hian Perry-a ṭhianṭhate leh a thawhpui ṭhinte an inlan dawn tih an sawi. Mary Robertson chu director niin, Sony Pictures Television-a Maxine Productions banner kaltlangin executive producer a ni nghal bawk. Executive producer zingah hian Lisa Kalikow, Eli Holzman leh Aaron Saidman-te an tel.