Coachella Festival-a perform tur a hriat ta Ariana Grande a inlar dawn

Rimawi khawvela khawmpui lian leh ngaihhlut hlawh berte zinga mi, Coachella Valley Music and Arts Festival chu April 12-21 inkar khian neih a ni leh dawn a, perform turte hming pawh puanzar a ni ta. 

American singer Ariana Grande chuan he festival hi a khuhhawng dawn a, he festival-a opening chang thei naupang ber a ni nghal bawk. Kum 25 mi Ariana Grande bakah hian Childish Gambino leh Tame Impala-te chu festival khuhhawnna-a perform turte an ni. 

Coachella Festival hi music festival zingah chuan ngaihlut hlawh berte zinga mi a ni a, zaithiamte pawhin perform an chak ṭhin hle. Nilaini khan he festival-a inlan turte hi puan a ni a, rimawi khawvelah chuan 'titi' pui ber pakhat a tling nghal. 

'Thank U, Next' singer Arina Grande inlan tur chu ngaihven hlawh ber a ni a, opening chang thei naupang ber record a siam dawn a ni. Khawvel huapa zaithiam lar ber ber Beyoncé, Lady Gaga leh Björk-te hnung zuiin festival khuhhawngtu zingah a ṭang dawn a ni. 

Icelandic singer Björk chu hmeichhe zinga openging chang hmasa ber a ni a, 2002 khan ropui takin a lo inlan tawh a ni. 

Kum 2017 khan Lady Gaga chu sawi zui hat tling khawpin a lo perform tawh a, nikum khan Be­yoncé a lo intheh ṭhil ve tawh bawk. 

Kumina perform tur zingah hian American singer Khalid pawh a tel a, a ni bakah hian Zedd, Kid Cudi leh Janelle Monae-te chu thawm nei lian zual an ni. 

South Korean girl group lar BLACKPINK chu a vawi khat nan Coachella Festival-ah hian an perform dawn a, hmuh chakawm tawh tak an ni. BLACKPINK hi K-pop girl group zinga he festival-a inlan hmasa ber tur an ni dawn a, lawmpuitu pawh an ngah hle a ni. 

Coachella Valley Music and Arts Festival hi Indio, California-ah neih a ni dawn a, kar hninh chhung a awh dawn a ni. Nikum khan mi 250,000 chuang zetin he festival hi an chhim a ni.