SSU-IN SELF-SUPPORT AWARD HLAN

7th September, 2026

Students’ Self-Support Union (SSU), General Headquarters chuan zirlai mahni intodelhte hnena Award an pek ṭhin, 'Self-Support Award 2026' chu September 4 zan khan Ignite Studio Khatla-ah a hlan. He hunah hian school education minister, Dr. Vanlalthlana chu khuallian niin, F. Vanlalrochana chu khualṭha a ni.

Khuallian Dr. Mathlantea chuan zirlaite fuihna thu sawiin, zirlai a nih laia a theih ang anga ama zirna senso phuhru tura sum a thawh chhuah ṭhin thu a sawi. Ngaihsan tur dik ṭhalaite’n an ngaihsan a pawimawh thu te, zirlai chawimawina chi hrang hrang an hlan ṭhin thu leh Self-Support Award dawngtute chu chawimawi phu lehzual an nih thu a sawi. Khualṭha F. Vanlalrochana pawhin zirlaite fuihna thu sawiin, SSU president Robinson Zomuansanga’n thu a sawi bawk.

Self-Support Award hi zirlai pathum hnenah hlan a ni a, award hian pawisa fai Rs 20,000 leh lehkhabu pahnih Vanneihtluanga ziak, 'USA leh Unaute' tih leh Dr. Lalhmachhuana Zofa ziak 'Mizo Lalnute, Volume 1' a keng tel. Award hi GIG Motors sponsor a ni a, Jessica Lalchhanchhuahi, Pachhunga University College; Lalruatsanga, Govt. Aizawl College leh Lalremruati, Pachhunga University College te’n Self-Support Award hi an dawng.

Award dawngtu zinga Lalremruati hi mi bungrua la chhawnga hlep awma zawrh, mi in tifaia inhlawh, bungrua deliver, mi thawmhnaw suk, naupang sikul kal hruaisak, pickle siam leh zawrh hnate a thawk. Make-up leh skincare lam zawrh, futui leh lassi zuar tein sum a thawk chhuak ṭhin bawk. Tunah hian PUC-ah 5th Semester BA (Mizo) a zir mek.

Jessica Lalchhanchhuahi hian stationery item leh thuamhnawte a zuar ṭhin. Lamkal Technologies Pvt. Ltd. leh Mark Events-ahte inhlawhin heng firm kaltlang hian a zirlaipui tam tak tan inhlawhna a siamsak bawk. Homemade dessert leh cake siamin a zuar bawk. Tunah hian Pachhunga University College-ah 5th Semester BA (Sociology) a zir mek a ni.

Award dawngtu zinga mipa awmchhun Lalruatsanga hi leivung paih, mi insaka inhlawh, GnG Crew-a Event plan, college-a Class kal paha waiwai leh pickle zawrh bakah delivery hna a thawk a ni. Tunah hian Govt. Aizawl College-ah 3rd Semester BA (Political Science) a zir mek.