Box Office: Spider-Man: BND' a zawnin kar 6 chhung No.1 ni ta

North American Box Office-ah Marvel Comic huanga solo-hero che ṭha ber ni zui zel turin 'Spider-Man: Brand New Day' chuan a zawna kar rukna atan chart-ah No.1 a ni zui zel.

'Spider-Man: BND' hi kumin chhunga film tihchhuah tawh zinga Top Spot luahlum rei thei ber a ni mek. Kar hmasa chhung khan North America-ah USD mtd 18 lak luh belh lehin, domestic huanga sum a lak luh tawh zawng zawng hi USD mtd 923 a tling tawh a ni. Hei bakah khawvel huapin film sum la lut tam zingah pathumna dinhmun luah mekin, USD tld 2.4 la lut tling tawh bawk. Kum 2009-a tihchhuah Avatar leh Avenders:Endgame chiah sum lak luh tam lamah hian a phak lo a ni.

Christopher Nolan kutchhuak 'The Odyssey' pawh a dinhmun ngai, pahnihnaah a insawh nghet zel a, kar hmasa chhung khan USD mtd 13 a lak luh belh leh thei. Roadrunner tiha kan lo hriat lar ṭhin, cartoon live-action leh animation inpawlha siam 'Coyote vs. Acme' chu pathumnaah tla thla ve tawhin kar hmasa chhung khan USD mtd 12 a lak luh belh leh thei.

Mark Wahlberg channa film thar, 'By Any Means' chu palinaah a lang pha a, tihchhuah karah USD mtd 7.5 a la lut tling nghal. Horror film hmuhnawm em em ṭhin chhunzawmna 'Insidious: Out of the Further' pawh USD mtd 6.5 lak luh belh lehin Top 5 a la khar phak.