'Who are you going to be?' film tlangzarh

Mizo film thar, tunlai Zoram khawvel min run mektu leh chhungkaw tam tak an rum vawng vawng phahna ni bawk 'Ruihhlo' in kan ram a tihbuai dan leh, chumi laka kan tu leh fate venhimna a mawhphurhna hrang hrang kan hlen ngaite tarlanna lam "Who are you going to be?'film chu nimin khan minister C.Lalsawivunga'n a office chamber-ah a tlangzarh.

'Who are you going to be?' hi T.C. Vanlalzauva, Orientation Media Film siam niin, director hian kum 1997 daih tawh aṭang khan Mizo film hriat hlawh tak tak a lo siam tawh ṭhin. A film siam thar tlangzarhnaah director hian film lama inhmang hranghlui mi 11 hnenah chawimawina a hlan nghal bawk.

Film thar tlangzarhtu minister C.Lalsawivunga chuan , "Ruihhlo leh zu in kan hnam a run a, chhungkua min tichhe zel a. Hemi do tur hian chhungtin kan ṭanrual a ngai a ni," a ti. Lalawmpuia Khiangte, Sr.Vice, Chairman, Mizoram Film Forum pawhin "He film thar hian Mizote mamawh tak a tarlang a, ruihhlo leh zu avanga nunna kan chan zozaite hian rilru a tina a, tunah hi chuan a do kawngah nasa lehzuala kan ṭan tlan a hun tak zet tawh a ni," tiin film tharin a entir mipui lam mawhphurhna awmte a sawi lang.