Rannung hmuh chhuah thar Taylor Swift hming put tir

American singer-songwriter Taylor Swift chu, tun hnaia Australia-a rannung chi khat an hmuh chhuah thar hming an put tir. Riverside-a California University-a researcher-te chuan he rannung chi thar hi Swift hming an phuah a ni. Hei hi rannung an hmuh chhuah thar 12 chungchang tarlanna paper, 'Insect Systematics and Evolution' journal-ah tihchhuah a ni.

Heng rannung zinga pakhat chu Swiftiephylus tia phuah a ni a, Swift-i fan-te sawina 'Swiftie' tih chu he rannung hmuh chhuah thar 'Phylus' nen hian phuah zawm a ni. Rannung chi hrang pali dangte pawh Swift-i hming chawi tir an ni a, chungte chu Swiftiephylus taylorae, Swiftiephylus amator, Swiftiephylus intrepidus leh Swiftiephylus poetorum-te an ni. UC Riverside entomology doctoral zirlai, Sarah Schroeder chu Swift hming chawia rannung hming phuah chungchanga thutlukna siamtu a ni bawk.