G.I.G Motors Ṭhazual Lengzem : Ben Opa x Kimkima 'Chhingmit Buangte' in chart thunun thei ta

G.I.G Motors Ṭhazual Lengzem chart tharah music producer lar thar, Ben Opa leh Kimkima thawh dunna hla mawi cial tak mai 'Chhingmit Buangte' chuan tihchhuah aṭanga thlakhat liam hnuah Ṭhazual Lengzem chart a rawn thunun thei ta. He hla hi Ben Opa phuah leh siam niin, Kimkima aw nen pawh a inmil hle a, a rawn sa chhuak nalh lehpek hle.

'Chhingmit Buangte' tih hla hian 1.2 milliom view nei tling tawhin, thla khat chhung leka view a neih theih zat aṭang ringawt pawh hian he hla mawi titu leh ngainatu an tam thawkhat hle tih a chiang. A hla hi tunlai hla chhuak ni awm lo khawpin a vibe a classic ruih ruih hle. Video hi Jon Mizo kutchhuak niin a hla leh music video hi a inchawih mawi hle bawk.

Project Wallflower hla mawi em em mai 'I hmangaih kha' tih hla pawh pathumna aṭangin pahnihnaah a kaisang thar a, hla a mawi bawka chart a thunun zui pawh a rinawm. Mizo Idol aṭanga Zoram rimawi khawvel timawi zualtu, Sakha hla 'Turnipui kawlah liamin' tih chu pakuana aṭangin Top 3-ah a chho bawk a ni.

Tunlai Mizo Band kan neih ṭhat leh hla nei mawi thei tak, Lilac & Jack hla 'Kan thawnthu kha' tih palinaah a chho a, hei bakah hian an hla vek 'Lung min len' tih pawh pakuanaah a rawn lang thar bawk. Nanaua Hmar hla thar 'Sam ang ṭhen zai an rel ka nghak e' tih chuan Top 5 a rawn khar phak tawh bawk.