Mattel-in Lenny Kravitz doll tlangzarh

Toymaker lar, Mattel chuan rocker Lenny Kravitz doll a tichhuak a, musician zingah Barbie franchise-a ama pual doll nei hmasa ber a ni.

Kum 2025 khan Mattel chuan Barbie Signature Kenbassador Collection an siam tur thu an lo puang tawh a, hemi hmang hian milar mipate doll siam chhoh zel an tum a ni. A hmasa ber atan basketball star, LeBron James doll an siam a, Lenny Kravitz hi a pahnihna a ni.

Lenny Kravitz chuan Barbie chu thil hlu leh ropui tak a ni tiin, Mattel in Kenbasador atana an thlang chu lawmawm a tih thu leh, a tan chawimawina ropui tak a nih thu a sawi. Kravitz hi kum tam tak chung style icon a sawi a lo ni tawh a, a doll pawh rock vibe-a siam niin, tank top, bootcut denim jeans, boot leh tarmit leh sunglass te nen a inthuam a ni. A bana tattoo a chhut pawh tilangin, a trademark dreadlocks pawh puttir a ni bawk. Barbie Kenbassador Lenny Kravitz doll hi major retailer kaltlangin lei theih a ni tawh a, USD 70 man a ni ang.