Zaninah 'Nun Kawng' tlangzarh dawn

Mizo film thar leh kumina Thriller lam hawi film chhuah awmchhun ni turin, One Vision Cine kutchhuak 'Nun Kawng' tih chu zanin hian Chanmari YMA Hall-ah tlangzarh a ni dawn.

'Nun Kawng' film-ah hian actor larsate chhawr aiin ṭhalai mi thar zawkte tana hmun siamsak a,kawng hawnsak chu an thil tum pakhat a nih a vangin mi thar tam zawk an chan thu director Lalnunsiama chuan Vanglaini a hrilh. 'Buanga and Friends' aṭanga Zoram mipui tam zawkin a hmelhriat Mapianga rawn changin a part a hnehsawh leh hle.

Film-ah hian mihring duhamna leh pawisain kan mit a tihdel theih zia, mi tam tak nunah a chhe zawnga nghawng a neih dan leh thihna hial a thlen dante kan hmu dawn. He film hi Dr Lalmalsawma Nghaka produce niin tlangzarh zan hian Leikapui Studio leh Lersia Play-ahte lei theih a chhawp chhuah a ni nghal bawk ang.