Synod Choir music video thar hlân
Mizoram Synod Choir music video thar 'Lalpa Kohhran' chu kar liam ta Inrinni zan khan Rev. John Raldosanga, Administrative Secretary, Chhim Area, Mizoram Synod chuan Lawngtlai Bazar Biak- inah Pathian hnena hlanna a nei.
Inrinni aṭang khan CKṬP buatsaihin Lawngtlai Bazar Kohhranah KṬP Chhim Bial Musical Meet neih a ni a, nizan khan a ṭiak. Inrinni zan inkhawm banah Lawngtlai Bazar Kohhran Biak-ina fellowship neihnaah Rev. John Raldosanga hian Synod Choir 2018-2020 music video pangana 'Lalpa Kohhran' hi Pathian hnenah a hlan. He music video hi CKṬP YouTube channel-ah en leh ngaihthlak theiha dah nghal a ni.
'Lalpa Kohhran' hi Synod Choir conductor T. Laldintluanga phuah a ni a, Kings & Prophets-ah record a niin, video hi Asanga Dosel kutchhuak a ni thung. KṬP Chhim Bial Musical Meet-ah hian zaipawl leh zaithiam eng emaw zat an kal. Mizo Idol Rebecca Zorintluangi, Mawitei, Isa Pachuau, One in Christ, Arini, 'Harhna ropui' hla aṭanga kan hriat lar Tetea, Mizo Idol aṭanga kan hriat lar tho Maruati te, Praise On atanga kan hriat Loncy, FKA, Isaac-te bakah Youth Icon aṭanga kan hriat Andrew leh Achhuani-te an kal.