Ellen DeGeneres leh Sandra Bullock-te'n thubuai ziak lut

TV show host Ellen DeGeneres leh American actress Sandra Bullock-te chuan Nilaini liam ta khan intiam rualin, an phalna la loa Sketchy company-in an product hralh theihnan anmahni an hman avangin, Los Angeles-a Superior Court-ah thubuai an ziak lut.

An thubuai thehluhah hian an phalna la loa advertisment-a anmahni an hman thu leh 'right to publicity' palzutna a nih thu court-ah hian an thlen. DeGeneres leh Bullock-te lawyer chuan court-a thubuai an ziah luhah hian an kumte, an hmingṭhatnate leh an lar avangin he company hian an product tih lar nan, DeGeneres leh Bullock-te hi advertisment atan an hmang ta nia an ngaih thu a ziak tel.

Phalna la loa thil tihchhuah chungchangah milarte pawhin khin an tawk ta fo. Tunhnai lawk khan Gigi Hadid, Jennifer Lopez, Justin Bieber leh midangte pawhin thlalatu phalna loa an thlalak an post avangin paparazzi ṭhenkhatte'n an lakah thubuai an lo ziak lut tawh a ni.