Social media hi inhuatna leh Anxiety neih theihna a ni : Dua Lipa

English singer Dua Lipa chuan social media hi inhuatna leh anxiety neih theihna a nih thu BBC Breakfast-in an kawmnaah a sawi. Kum 24 mi Dua Lipa hian social media chungchanga a ngaihdan chu sawi chhuakin, a thil post ṭhenkhat chungchanga an comment-nate pawh a chhiar duh loh fo ṭhin thu sawi langin, a hmuh duh lo thil tam tak social media kaltlanga a hmuh ṭhin thu leh a nunah nghawng a neih theih thu a sawi chhuak.

"Social media hi hmanraw ṭha tak pakhat a ni a, he platform kaltlanga thil hlimawm tak tak post-te hi a nuam a ni. Mahse a chang chuan social media aṭanga thil tam tak kan hmuh hian kan nunah nghawng ṭha lo a thlen thei. Chutihrualin mi chuan an duh duh post turin zalenna an nei a, mahse an computer phenah an nunchang an thukru ṭhin . Ka ngaihdan chuan social media-ah hian hun tlemte chauh pek hi a ṭha ka ti," tiin Dua Lipa chuan social media-in a nuna nghawng ṭha lo a neih thu a sawi.

Hmanni lawka Grammy Award pahnih dawngtu Dua Lipa hian a hla thar "Don't start now" chu YouTube lama a fan-te en theih turin a tichhuak a, a video thar hian viewer maktaduai 24 chuang a nei der tawh. November 16-a Mumbai DY Patil stadium-a neih tur 'OnePlus Music Festival'-ah Dua Lipa hi a rawn zai dawn a, India a vawikhat rawn kalna tur a ni bawk. Ani bakah hian Katy Perry pawh he hunah hian a zai dawn a ni.