Lehkhabu bawm: Pakla Hisâp II lehkhabu tlangzarh

Dr. Jonathan Lalrinmawia lehkhabu pahnihna, 'Pakla Hisâp II' tih chu October 3 khan Mizo Academy of Letters treasurer ni lai, Dr. Dorothy Zonunsangi chuan a ziaktu chenna in, ITI vengah a tlang zarh. He lehkhabu tlangzarhnaah hian Mizo Grammar Society general secretary, Lalengmawia Colney chuan lehkhabu thlir lawkna hun a hmang.

Khawl thluak nei leh thiamna chi tinrenga hmasawnnain hring nun a nuai vir vel lai hian mihringte mamawh dik tak chu changkanna dik, mahni hnam nun phung tlansan si loa changkanna leh inher rem thiamna hi a ni. Chu tak chu 'Pakla Hisâp II' ah hian kan hmu a ni. He lehkhabu hian mi puitling rilru pu chunga tunlai khawvel hmasawnna mila thil thlir dante, kan hnam nunphung tlansan si loa rilru changkang leh diktak hmanga hringnunin a ken tel thil chi hrang hrang - politics, sumdawnna, sakhuana, incheina, faina leh thianghlimna, hmangaihna, thihna, harsatna chi hrang hrang leh leilung pian kena thil mawi leh hlu tak takte thlir dan min kawhhmuh a ni. Lehkhabuah hian chhiar nuam leh tawi fel tak, ninawm hman hauh loa chhiar tura rem khawm a ni.