Hnahsin Kut: Zaninah KIMOCHI hoin EDM Night

Kumin October 6 aṭanga Champhaia Hnahsin Kut hman mek chu chhunzawm zel niin, zanin hian a vawi khatna atan EDM Night hman a ni dawn a, he hunah hian Mizo DJ kan neih ṭhat zinga mi KIMOCHI chuan hun a hmang dawn. KIMOCHI hian darkar thum vel hun a hmang dawn a, EDM Night hman vawi khatna tur a nih avangin ṭhalaite leh kut chhimtute mit leh beng a tlai hle a rinawm.

Vawiin Inrinni chawhnu dar 2 aṭangin "Costume Day, Hnahsin Kut Par Ni" hman a ni dawn bawk. He hunah hian MCO Arcadia: Cosplay Showdown 2025-a best performance winner Tara Malsawm a perform dawn a, hemi ṭuma solo-performance-a lawmman pakhatna latu Mary Kim pawhin performance hmuhnawm tak a nei bawk ang. Hemi nia par vul taka inchei hnenah lawmman pek a ni dawn a ni.

Hnahsin Kut chhung hian music concert, EDM Night, runway show, dance fusion, cosplay bakah heritage tour, traditional show, paragliding, kiting leh angling-te neih tur a ni a, Zotlang field-ah Exhibition stall leh Food Stall ṭhahnem tak awmin, Kids Playhouse siam a ni bawk. Hnahsin Kut pual hian hnahsin hmun zau tak Saii Mual leh Mualbuhvum, Zotlang field leh kawngsirah te siam a ni a, kut ṭan hma aṭangin hnahsin hmun tlawhtu khualzin leh khawtual mi an ṭhahnem hle.