Hontrade International Ṭhazual Lengzem-ah Essy 'Kan hawi kir lo'ng' a hawi kir lo

Hontrade International Ṭha­zual Lengzem-ah Essy hla thar ber 'Kan hawi kir lo'ng' chuan thlan hlawh berin pakhatna a ni a, Ticos Dara 'Lunghlu' chu pahnihna niin, Sangkimi Khiangte 'Tuar thiam a har ngei e' chu pathumna a ni bawk.

Essy hla thar ber, music video pawh hmuhnawm tak leh changkang taka an siam,  'Kan hawi kir lo'ng' chu tihchhuah a nih hnu lawk aṭang khan chart-ah a lang nghal. Chart-a a lan aṭang hian a hit nghal a, hawi kir lam ngaihtuah loin, hmalam a pan zel a, tunah chuan tuma tluk theih tawh loin pakhatna a ni ta a ni.

He hla hi September 20-a a tihchhuah kha niin, YouTube lamah pawh thlirtu nuai thum chuang a nei tawh a, ṭhazual chart-a pakhatna a ni thei pawh hi thil mak a ni lo. Essy hian hun eng emaw chen a reh hnuah 'Kan hawi kir lo'ng' hi a rawn tichhuak a, video teaser tihchhuah aṭangin boruak a nei nghal hle. He hla hi Rpa Ralte phuah a ni a, RP Records-ah recording tih niin, video hi BS Pictures siam a ni bawk.

Music video-ah hian Mizo Dance Camp (MDC)-ten an pui a ni.

Ticos Dara 'Lunghlu' chuan hmalam a pan zel a, chart hma­saah khan pangana niin, tunah erawh pahnihnaah a rawn invawrh thei a, hei hian he hla duhtu an tamzia a tilang awm e. Sangkimi Khiangte 'Tuar thiam a har ngei e' chuan chart hmasa aia hmasawn hretin pathumnaah a rawn inhlangkai a, hma a sawn zel a rinawm.

Chart-a pakhatna dinhmun pawh lo hauh tawhtu Feli Fanai  'Lengdang ṭang a bel' chu chart luahlumtu la nih chhunzawm zelin, palina a la ni phak a, he hla lungkuai tak mai hian ngaihthlak a hlawh hle. YouTube lamah pawh thlir a hlawh hle a ni.

Jaui 'Ka hawisan tawh che' pawhin hma sawn zelin, panganaah a rawn inhlangkai ve tawh bawk.

Hontrade International Ṭhazual Lengzem Top 10

1    Essy    - Kan hawi kir lo'ng

2    Ticos Dara    - Lunghlu

3    Sangkimi Khiangte    - Tuar thiam a har ngei e

4    Feli Fanai    - Lengdang ṭang a bel

5    Jaui    - Ka hawisan tawh che

6    Dj Lalvenhimi    - Khuarei an 

7    Lawmi Khiangte    - Love at first sight

8    Marina V Varte    - Turnipui

9    CVL Hmudika -    A kim ngei ang 

10    Jonathan Lalengzauva - I tan ka hmangaihna