Mizo Rock Band movie hmasa ber tur "Buizoa Radio: Vawi Khat Leh"

Mizo sitcom hmasa ber 'Keimahni' Season 1 & 2 hmuhnawm leh hlawhtling taka an tihchhuah hnuah, Jeronimo Production chuan kan la hmuh zen zen loh Mizo rock band film hmasa ber tur an buaipui leh mek. Film thar tur hi 'Buzoa Radio: Vawi Khat Leh' tih a ni dawn a, Mizo film-a kan la hmuh tam loh rock band story lam a ni dawn a ni.

Mizo actor lawm hlawh ber zinga mi, Rynzuala a inlan dawn. Hei bakah Jeronimo Production sitcom lama kan lo hmelhriat tawh, PUC music video aṭanga rawn lar chho lehkhabu pasarih ngawt tichhuak tawh Hriatpuia Kion bakah, 'The Pit' show-a lar rapper Enkawla Sailo leh Chanmari nula lam thiam, HV Tetei ten main role an chang dawn.

Anni bakah hian Mizo Film Award best Actor lo dawng tawh Maruata Rawite, leh GreenRocket aṭanga lar BZ-a te inlan dawn bawk. Film hi Jerome Hauzel ziah leh direct a ni dawn a, DoP hi Saktea a ni. Rynzuala leh Hriatpuia-te hian mi dang aw hmang loin anmahni ngei an zai a ni. Shooting zo tawhin November thlaah tlangzarh hman tum a ni.