Self Support Award 2019 dawngtu zirlai pathumte
Student's Self Support Union chuan zirlai ni chunga an zirna senso leh chhungkaw pawimawh tur sum thawk chhuak a, intodelh theite chu kum 20 chuang kumtin an lo chawimawi tawh ṭhin. Kumina Champhai-a SSU General Assembly-ah khan zirlai pathum chawimawi leh an ni a, heng ṭhalai pathum tumruhna leh huaisenna avang hian SSU Assembly-na hmuna kalte chu an mittuite a tla hial a, chung mite chanchin chu ZONET - Zoram Kalsiam Programme chuan documentary an siamsak a, he programme hi zanin dar 8-ah ZONET Zawlbûk Channel-ah tihchhuah tum a ni.
Self Support Award dawngtute zinga pahnih hi zirlai ni chunga Vanglaini chanchinbu sema inhlawh an ni a, pakhat hi online hmanga pheikhawk chah a, thawn kual leh ṭhin a ni a, zai leh lamna hmun (karaoke) enkawltu a ni bawk.
Self Support Award dawngtu zing ami Vanlalmalsawmzuali hi Khawhai khua, tuna Pachhunga University College a BA 1st Semester zirlai a ni a, ani hian zing dar 3/4 velah thoin Vanglaini chanchinbu a sem ṭhin. Chanchinbu a sem chungchang a sawinaa mite rilru khawihtu lian tak chu mipa anga a lan theih nana a sam a tan hi a ni. Zing hma tak takah Treasury velah a tei a ngai a, Vanapa Hall leh a chhehvelah drugs addict-te an tam ṭhin avangin a hlau a, "Ka sam ka zuah sei a, addict mipaho hian min en duh em em ṭhin a, ka hlau ve thei em em ṭhin. Mihring hi chu kan lan danah hian min hmuh dan tam tak a awm a, ka sam ka tan a, min hmuh dan a dang a. Ka sam sei hi mawi lo ka ti lo bik a ni lo, a ṭul vang a ni," tiin a sam tan chhan a sawi.
Award dawngtu mipa awmchhun chu Richard Lalhmangaihzuala niin, Saikhamakawn, Aizawl, tuna Govt. JL Higher Secondary School, Aizawl a Class-XII zirlai a ni. Richard-a hi chhungkaw harsa tak an nih avangin a chhungte pawhin a zirna chawlhsan tura an lo tih hial tawh a ni nghe nghe. Mahse, hna ṭul ṭul thawka a zirna chhunzawm chu a thlang tlat thung. Tunah hian Saikhamakawnah Vanglaini chanchinbu a sem a, khaw
ṭhenkhatah a thawn bawk ṭhin. Puan ṭhui a thiam a, Chess a thiam bawk avangin naupangte a zirtir bawk ṭhin. Self Support Award a dawnna chhan pui ber chu Vanglaini chanchinbu sem bâkah AMC hnuaiah Thawhṭanni leh Inrinniah bawlhhlawh paihin a inhlawh ṭhin.
Chawimawina dawngtu dang chu Veronica Lalthanzuali, Zotlang, Aizawl, tuna Govt. Aizawl College, a IIIrd Semester BA zirlai a ni. Veronica hian tunlai thiamna chu ṭangkai takin a hmang a, online-in pheikhawk an chah thleng a, heng pheikhawkte hi Mizoram hmun hrang hrang mai ni lo, India ram khawpui lian zawk thlengin an thawn ṭhin. Hei mai hi a ni lo, a sum khawlte leh a nu leh pate pawisa a puk hmangin Aizawlah zai leh lama intihhlimna (karaoke) a din a, chu chu College kal pahin a vil a, a thawk kawp ṭhin. A lehkha zir tibuai lo turin a invawng tlat a, a nu leh pa pawisa a puk pawh a rul tawh bawk.