Hnahsin Kut a ṭiak ta

Mizorama kut ngaihven hlawh, October 6 aṭanga Champhaia hman, Hnahsin Kut chu October 16, Zirtawpni ni liam ta zan khan Mualnuam Concert hmanga khar a ni ta. Kut lawmna hi khar ni tawh mah se, Champhai zawla Hnahsin hmunte chu nimin thleng khan tlawhtu an la ṭhahnem hle.

Hnahsin Kut Organising Committee buatsaiha Hnahsin Kut kharna, Mualnuam-a concert neihah hian tourism minister Lalnghinglova Hmar chu khuallian a ni a; Champhai pa, Adviser to the Chief Minister (Finance) TBC Lalvenchhunga pawhin a telpui a ni. Kut kharna concert chhimtu an ṭhahnem a, Mizo artist larte an che a, mipui lam thawm pawh a ring a, mit leh beng a tlai e.

Kut hi ni 11 chhung awh niin, social media reach hi 22.5 million a tling phak. Official report la chhuak lo mah se, kut hman chhung hian chhimtu mi nuai 1.2 vel an awm a, kut program hrang hrang aṭang hian Rs vbc 15 bawr hmu chhuak anga chhut a ni. Stall hrang hrang siam a ṭangin Rs vbc 2 bawr hmuh chhuah ni bawkin Champhai khawtualin Rs vbc 1.4 bawr hlawkna a tel pha nia chhut a ni.