Lehkhabu bawm : Boichhingpuii buatsaih “Mizo La Deh Leh Zethlan” (2nd Edition) tlangzarh

Boichhingpuii buatsaih, “Mizo La Deh Leh Zethlan” (2nd Edition) chu Inrinni khan Art & Culture director, Carol VLMS Dawngliani'n McCabe Hall, Aijal Club-ah a tlangzarh. Lehkhabu hi kum 2016 khan tihchhuah ni tawhin, 2nd edition-ah hian bung 5 belh a ni. Thlalak 85 dah belh bawkin, a vaiin thlalak 444 a awm.

Lehkhabu buatsaihtu Boichhingpuii hi Art & Culture director hlui a ni a, a lehkhabu buatsaih chhan sawiin Mizo puan hrang hrang a enin a zia leh tah dan dik lo tam tak a hmu ṭhin a, pipute aṭang a puan leh zethlan te a dik tak anga vawn nun leh tih lar zel a duh avangin leh, a dik tak a bo zawh mai a hlauh avanga lo piang chhuak a nih thu a sawi. Hluttu an tam avangin chhut hnihna pawh hi buatsaih leh a ni ta, hei pawh hi kum li vel a buaipui leh a ni. A lehkhabu hi ṭhangtharte tan cho na ni se, zau zawk leh thuk zawkin hetiang lam hi rawn hai chhuak se a duh dan a nih thu a sawi bawk.