SBI-in Rebecca Saimawii chawimawina hlan

Mizo zaithiam chuai thei lo, Rebecca Saimawii aka Makuri chu Thawhlehni khan State bank of India, Dawrpui Branch chuan rimawi huanga a sulhnu hnutchhiah ropui tak leh, kum tina mamawhte tana thisen a pek ṭhin hlu takte avangin chawimawina an hlan.

Makuri hian thisen hi vawi 93 a pe tling tawh a, sorkar laipui hnuaia Ministry of Health and Family Welfare-in April - June Newsletter a tihchhuah, 'Female Voluntary Blood Donation' tih theme-ah pawh khan ram puma hmeichhe thisen pe tam zingah a lo lang tawh bawk. Hnahsin Kut neih zawh takah khan Kut Organising Committee chuan a thlawna thisen a pek tam avangin Makuri hi chawimawina an hlan bawk a ni.

Makuri hian tunlai music producer kan neih ṭhat, Ben Opa nen thawk dunin hla thar an buaipui mek a, kumin chhung hian tihchhuah hman a tum mek. A vanglai huna lar ve tam takte tih theih loh a la ti thei zel hian nu chhuanawm tak a nih zia a tilang awm e.