5th Mizo Film Award sem a ni leh dawn

Mizoram chhunga lemchan huanga awards ngaihhlut hlawh, Tlau Entertainment buatsaih Mizo Film Award chu November 20, 2026 zanah sem a ni leh dawn ta. Mizo Film Award hi kum 2021 aṭang khan sem ṭan niin, kumin hi vawi nga an semna tur a ni.

Mizo Film Award 2026 hian November 2025 aṭanga October 2026 inkara film chhuakte a huam dawn a, endik hna pawh ngawrh taka kalpui mek a ni. Nikum lamah khan film 50 vel a chhuak a, kuminah erawh film 30 bawr vel awm thei tura beisei a ni thung.

Kum dang ang bawkin category hrang hrang siam leh niin, heng category zingah mipuiten vote hmanga an thlan 'People's Choice Award' chu boruak nei lian leh ber tur pakhat a nih ngei a rinawm. Best Original Sountrack (OST) thlan a ni leh dawn a, Film Industry tana zaimite thawh hlawkzia ngaihtuahin an puala category buatsaih hi a inhmeh hle.

Kuminah hian category thar 'Best Short Film' awm dawn bawk a, October 27, 2026 thleng theh luh theih a ni ang. November 2025 - October 2026 inkara chhuakte a huam dawn a, pawl leh mimala short film siamte a huam thei vek dawn a ni. Mizo Film Award 2026 main sponsor hi Union Bank of India (UBI) a ni.

Nikuma Mizo Film Awards semah khan Gilbert Colney chuan 'Thih leh Dam-II' film hmangin Best actor award a dawng a, Best Actress atan 'Mawla Loves Mawli' a changtunu, Rosy Lalramthlengi chu thlan a ni bawk.