Zaninah Praise On Top 10 kan hre thei dawn

Synod Information & Publicity (Synfo) leh Central Kristian Ṭhalai Pawl (CKṬP) ṭangkawpin a buatsaih, Malzai intihsiakna Praise On 2026 chu neih chhunzawm zel niin, zaninah Top 10 a tlingte an hriat theih dawn ta.

Top 50 intihsiakna hi Nilaini zan khan ṭan a ni a, nizan leh zaninah chhunzawmin zanin hian result puan nghal a ni ang. Mi 50 aṭangin mi 10 thlan chhuah an ni dawn a, Top 10 a tlingte hian November 19 & 20 ah Youth Recreation Centre, Falkland-ah Host Eunik Lalnunfeli kaihhruainain intihsiakna an nei chhunzawm ang.

Praise On Top 10 thlan chhuah aṭang hian round dang inelna buatsaih tawh loin winner leh top 3 thlan a ni ang. Hla pahnih hmangin inelna an hmachhawn leh dawn a, live instrument hmangin rimawi pawh tum a ni vek tawh ang. House Band-ah hian musician ṭha tak tak kan hmu dawn a, Guitar - T. Lalruatfela, Bassist - Lalremkima, Drums - Lalmuanzuala, Keyboard Samuel Vanlalruata leh Lalhlimpuia te'n Top 10 zai hi an tumsak tawh dawn a, mit leh beng pawh a tlai zual ngei ang. Endiktute hi Tual Upa Christ MS Dawngkima, Ramhlun North (chief judge); Benjamin Pazawna, Chanmari leh R. Lalrinmawii (Arini), Leitan te an ni.

Praise On 2026 pakhatna hian lawmman pawisa fai Rs 1,20,000 a dawng dawn a, pahnihnain Rs 70,000 leh pathumnain 50,000 an dawng dawn bawk. Top 10 tling chinin consolation prize Rs 10,000 ṭheuh an dawng bawk ang.

Synfo buatsaihin Praise On tih hmingpu hian inelna hrang hrang buatsaih a lo ni tawh ṭhin a, Praise On - Malzai intihsiak hi 2016, 2022, leh 2024 te khan neih a ni. Prise On tih hming pu vek hian KṬP Group zai intihsiak 2017 khan buatsaihin, 2018-ah Beat Group in elna buatsaih a ni leh a, 2019-ah Bial Zaipawl Festival buatsaih a ni. Nakkum 2027 March khian Tleirawl Inkhawm pualin "Praise On - Tleirawl Inkhawm Beat Group Intihsiak" tih chu kalpui a ni leh dawn bawk.