Netflix-in K-pop girl group siam dawn

Netflix chuan South Korea puma arts high school-a zirlaite tan audition project hmangin K-pop girl group thar a siam dawn. He thu hi October 21 khan Netflix chuan puangin, K-pop audition project 'We Go High' tih chu an produce dawn a, hemi ni vek hian a tel tur lak luhna an nei ṭan nghal a ni.

'We Go High' hi arts high school-ah neih a ni dawn a, school aiawh zirlai talent nei ṭha tak takte chuan he programme hmang hian inelna an nei dawn a, K-pop girl group thar zawn chhuahna hun a ni nghal dawn a ni. He programme-a telte hian an school chawimawina turin inelna hrang hrang an paltlang hnuah an debut ang. Programme hi Monstera House-a Park Jin Kyung leh Lee Jae Seok-ten an produce dawn bakah an direct nghal bawk ang. Netflix chuan 'We Go High' hmanga group din, debut leh hmalakna kalpuina turin SM C&C an thawhpui a, company pahnihte hian memorandum of understanding (MOU) an ziak a ni.