Praise On 2026 Top 10 tlingte a hriat ta!

Synod Information & Publicity (Synfo) leh Central KTP ṭangkawpin an buatsaih Praise On 2026 Mal zai intihsiak Top 50 Round chu October 21-23 chhung khan Synfo Studio, Synod Office-ah neih a ni a, October 23, 2026 Zirtawpni zan khan Top 10 tlingte puan a ni.

Top 10 te hian November 19&20, 2026 zanah hla pahnih hmangin intihsiakna an nei leh ang a, Live Instrument hmangin rimawi tum a ni tawh dawn a, inelna hi Youth Recreation Centre (YRC), Falkland-ah neih a ni ang. Intihsiak zan hnihnaah Final result puangin lawmman sem nghal a ni ang.

Praise On Mal zai intihsiaka pakhatna hian Rs.1,20,000/- a dawng dawn a, pahnihnain Rs.70,000/- leh pathumnain Rs.50,000/- an dawng bawk ang, Top 10 a tling mi dang pasarihte hian Rs.10,000/- theuh an dawng dawn a ni. Top 10 intihsiaknaa House Band turte hi Guitar T. Lalruatfela, Chanmari West Hmar Veng Branch, Bassist Lalremkima, Mission Veng Branch, Drums Lalmuanzuala, Ramhlun Vengchhak Branch, Keyboard Samuel Vanlalruata, College Veng Branch leh Lalhlimpuia, Venghlui Branch te an ni. Judge-te hi T.Upa Christ MS Dawngkima, Ramhlun North (Chief Judge), Benjamin Pazawna, Chanmari leh R. Lalrinmawii (Arini), Leitan te an ni.