Mana Motors-in 'Great Escape' buatsaih

Mizorama Mahindra full range dealer, Mana Motors chuan an lirthei zawrh leitute tana kumtina an huaihawt ṭhin, 'The Great Escape' chu Inrinni khan an buatsaih leh a, Hmuifang tlangah hun an hmang.

'The Great Escape' hi tlangram kawng chhengchhia leh kawng nalah Mahindra lirthei a hman tlak tih pholanna a ni ber a, lirthei 40-50 vel telin mi 100 vel an pung khawm. Mahindra Head Office, Mumbai atanga lo kal Satinder Kumar chuan Falkland, Aizawlah a vai liam a. Hmuifang tlangah kawng chhiaa intlansiak, silai inkahsiak leh inelna hrang hrang bakah naupang intihhlimna an nei tel a, zan lamah Shai Hills nen hun an hmang a ni.

Mana Motors hian kumin January aṭanga October 25 thlengin India ram puma lirthei hralh chhuah zat chhinchhiahna Vahan-ah 2,000 deuhthaw an ziak lut taw. May khan 281 ziak lutin a vawi khat nan thla khat chhunga Mizorama lirthei ke li nei zuar zinga ziak lut tam ber an ni a, July khan 237 tlinin ziak lut hnem ber an ni bawk.