Samsung Company ‘Software Engineer’ ah Mizo Nula

Samsung Research & Development Centre, Bangalore ah ‘Software Engineer’ hna thawk turin Mizo nula, Lalrinfeli Hnamte, New Delhi lak a ni. Samsung Electronics hi khawvel pum huapa company lian (Market Capitalization) leh ngaihhlut (Brand Value) sang ber zinga mi a ni.

Lalrinfeli hian kuminah Delhi Technological University aṭangin B. Tech, Computer Science & Engineering (CSE) ah 8.54 CGPA hmuin ‘First Class with Distinction’ ah a zo.

B. Tech (CSE) final year a zir laia a research paper "Hybrid-Encoding Multiparty Quantum Key Agreement with Dual-Parity Verification” (Designing protocols for cost effective and secure data exchanges through cloud services in the future 6G era) chu Institute of Electrical and Electronics Engineers (IEEE), khawvela engineer-te intelkhawmna pawl lian ber pakhat chuan kumtawp lama International Conference on Networks and Cryptology (NetCrypt 2026), New Delhi-a neih turah 'Oral Presentation and Publication as a Full Paper' tur in a thlang. Lalrinfeli hi Lalchhandama, Joint Secretary, Ministry of Rural Development, Government of India leh Er Lalthanpari, Scientist, Bureau of Indian Standards, New Delhi te fanu a ni.