China brand pahnihin Mbappe thawhpuina titawp

France leh Real Madrid player thawm nei lian, Kylian Mbappe chu social media-a China hruaitu ropui Mao Zedong hmanga fiamthu thawhna rawng kaia meme siam a comment avangin China brand lian pahnih, Dongpeng beverage leh bawnghnute lam product siamtu brand Mengnui-te chuan an thawhpuina an titawp.

Mbappe 'The Dictator' an tih ṭhin avangin China ram hruaitu lu ni ṭhin Mao Zedong thlalak-ah Mbappe lu hi dahin siam danglam a ni a, Mbappe chuan he meme a comment-naah hian meme a nuih tizabertu a nih thu sawiin, ama lu an dahna chu "Chinese dictator a niin kahria" tiin a sawi. He thil hi China lam chuan an ngai thutak hle a, Mbappe thawhpuitu China Brand chuan an ram hruaitu deusawhna rawngkai chu an palzam theih loh thu sawiin an thawhpuina hi an titawp zui ta a ni.

The Dictator meme hi kum 2024 bawr vel khan fiamthu thawhna atana siam niin a lar zui hle nghe nghe a, Mbappe ngei pawhin an ṭhian hoa online games an khelh ṭumin meme an hman uar leh a hlimpui tak a nih thu hi a lo sawi lang tawh a ni.