Forbes Highest-Earning Celebrity 2018: Hmeichhe zinga sum lalut hnem ber Kylie Jenner

Khawvel huapa magazine lar Forbes chuan kum 2018 chhunga milar sum lalut hnem zual mi 100 a tarlang leh ta a, hmeichhe zingah American reality star Kylie Jenner a chungnung ber. Kum 21 mi Kylie Jenner hian kum khat chhungin $mtd 166.5 zet a thawkchhuak a, top 3-ah a inhlangkai a ni. 

Hetih lai hian American boxer ropui Floyd Mayweather chu sum hailut hnem ber a ni a, actor George Clooney chu pahnihna a ni. 

Zaithiam lar ber berte leh model lar tam takin an tluk loh Kylie Jenner hlawhtlinna hi 'titi' a tling a, an infak siak a ni ber. Kum khat chhunga a sum lakluh hi a namai lo hle a, footballer lar - Lionel Messi leh Cristiano Ronal­do-te ai pawhin a lalut hnem a ni. 

'Keeping Up with the Kardashians' star Kylie hian a sumdawnna aṭangin sum a hailut hnem hle a, reality show leh thil dang aṭangin a lalut bawk. Kum khat chhunga a thawh chhuah $166.5 hi namai lo tak a ni a, amah hnaih bertu American lawyer Judy Sheindlin chuan $147 a lalut a ni. 

Kylie hi 2017 kha chuan 59-na a ni phak ṭhawk a, nasa takin hma a rawn sawn a ni. 

Sum a duh em avanga a hming lemah 'Money Mayweather' an tih, American boxer Floyd Mayweather chuan kum 2018 chhung khan $mtd 285 zet a lalut a, milar zinga sum lalut hnem ber a ni. 

American filmstar lar George Clooney chu pahnihna a ni a, kum khat chhunga a sum lakluh hi $mtd 239 zet a ni. George Clooney leh Mayweather-te chauh hi $mtd 200 chuang lalut thei an awm a ni. Actor Dwayne 'The Rock' Johnson chu top 5-ah a lang a, kum kalta chhunga a sum lakluh hi $mtd 124 a ni. 

Rimawi khawvela sum hailut hnem ber chu Irish rock band lar U2 an ni a, British rock band Coldplay chuan an dawt a ni. U2 hian kum kalta chhung khan $mtd 118 zet an thawk chhuak a, rimawi hungah bik chuan an ni aia thawk chhuak hnem an awm lo. 

Coldplay chuan $mtd 115 zet an lalut ve bawk a, sum lakluh tam lamah pasarihna an hauh phak a ni. 

English singer Ed Sheeran chu mimala thleng sang ber a ni a, $mtd 110 lalutin pakuana a ni. 

Forbes Magazine chuan footballer zinga sum lalut hnem berah Barcelona superstar Lionel Messi an puang a, khelmual chhunga a elpui ber Cristiano Ronaldo chu a khum a ni. 

Messi hian 2018 chhung khan $mtd 111 a laut niin an tarlang a, hetih lai hian Ronaldo chuan $mtd 108 a lalut a ni. Messi leh Ronaldo-te hi footballer zinga top 10-a lang awm chhun an ni a, pariatna leh sawmna an hauh a ni. 

Milar sum lalut hnem zualte sum lakluh belhkhawm hi $tld 6.3 zet a ni a, kum hmasa aia a punna chu 22% zet a ni. 

1. Floyd Mayweather     - $mtd 285

2. George Clooney     - $mtd 239

3. Kylie Jenner     - $mtd 166.5

4. Judy Sheindlin     - $mtd 147

5. Dwayne 'The Rock' Johnson     - $mtd 124

6. U2     - $mtd 118

7. Coldplay     - $mtd 115

8. Lionel Messi     - $mtd 111

9. Ed Sheeran     - $mtd 110

10. Cristiano Ronaldo     - $mtd 108