Kerala-a Film Festival-ah Mizo film 4 tichhuak dawn

Kochi, Kerala-a 'Rain International Nature Film Festival' neih mekah Mizoram state chu focus state-ah puan niin, Mizoram aṭangin film pali tihchhuah a ni dawn.

Festival hi nimin khan Information, Public Relations, Printing & Stationery (IPRPS) minister B Lalchhanzova chuan a hmanpui a ni. Minister hi IPR joint director Pratap Chhetri, minister private secretary Remlalliana Hnamte bakah Mizo film maker pathum - Napoleon RZ Thanga, Lalruatfela leh K Lalrinzuala ten an ṭawiawm a; festival hawnna inkhawmah hian Bangalore Mizo Association (BMA) ten Mizo hnam lam an entir bawk.

Rain International Nature Film Festival hi sik leh sa leh environment lam hawi niin, Kerala filmmaker lar leh National Film Awards Jury chairman hlui Jayaraj buatsaih a ni a; festival hi SCMS School of Technology & Management-ah neih niin, October 31, 2026 thleng a awh dawn. B Lalchhanzova chuan, sik leh sa, thing leh mau, ramngaw hlutzia leh humhalh a ṭulzia inzirtirna lam hawi film festival buatsaihah Mizoram film maker-te sawm an ni leh Mizo film pali tihchhuah a ni tur chu lawmawm a tih thu a sawi.