Sangi'n Zodini a hneh nawn

Nulian inchaiah champion lai Lalhmangaihsangi chuan Title Fight hnuhnung bera a hneh tawh Zodinpuii a hneh nawn a, round nga an inchai hnuah 14-1 a chakin a title a humhim.

Round hmasa berah Sangi'n Zodini nawr chhuakin point khat a hmu a, round hnihnaah Zodini'n nawr chhuak ve thungin, an point hmuh a inang ta chiah. Point awm loin round thumna leh round lina an hmang zui.

Round nganaah Zodini a inthlahdah a, Sangi'n kuai letin a zangthalin a bawhbet a, vawi thum an chhiar hnuah tal chhuak mah se Zodini a inveng zui thei lo a, Saichal nula Sangi'n vawi 10 chhiar thleng bawhkhupa a bawhbeh hnuah inchai a tawp zui.

Kum 24 mi Sangi hi a zawnin vawi thum a champion ta a, Lunglei nula Zodini erawhin chetsual a tum tawh loh thu sawi mah se a tlawm nawn. Zodini hi kum 2022 khan nulaihawl Title Fight-ah Elizabeth Roblupuii hneh lovin Zodini a tlawm tawh a, nuliana a insawn hnuah Sangi lakah a tlawm nawn a, title chuha vawi thum inlan zawnna a nih rualin a chak lo zawkah a ṭang vek.

Nulaihawl Champion Eli-i'n nulianah insawn a tum thu a sawi a, Sangi hian Bawngkawn West nula Eli nen inhmachhawn a châk thu a lo sawi tawh a, Title Fight hmasa berah an intawng a nih chuan mipui ngaihven a hlawh ang.