Der Klassiker-ah chak zawk awm lo

Inrinni zan Bundesliga-ah Bayern Munich leh Borussia Dortmund te an inkhel a, hmahruaitu nih inchuhna inkhelah hian chak zawk an awm lo a, 2-2 in an inhnehtawk.

Bayern tan Konrad Laimer leh Dayot Upamecano ten goal khat ve ve an khung a, Dortmund tan Serhou Guirassy leh Fabio SIlva ten an si phurh sut ve ve.

Allianz Arena-ah inkhel ṭan hmain Harry Kane chu Ballon d'Or nen a inlan a, a club bakah an khingpui player leh fans-in zahna an lantir a, mahse, Kane hian a lawm nan goal a khung thei lo thung.

Minute 38-naah Konrad Laimer-a'n Michael Olise ball pek chu um lutin a pet nghal a, Dortmund keeper Gregor Kobel-a'n dang per mah se a per let chu a khung leh nghal a, Bayern-in hma an hruai.

Bavarians-in an vanneih a siamin minute 56-naah penalty an hlawh chhuak a, a pet turin Kane a lo pen chhuak. Mahse, English forward hian goal kham a pet per a, pet goal ngat se result a danglam ang.

Dortmund-in an vaw let nghal a, minute 60-naah Guirassy-a'n a hun ṭha neih a hlah duh lo a, a team tan an si phurh sutin, Manuel Neuer aia lut Jonas Urbig-a'n a dang hman lo.

Mahse, Dortmund hlim chhung a rei lo - Bayern-in Upamecano hmangin an hmahruaina goal an khung leh nghal a, a nawrtuah ṭang chhunzawmin Kane-a'n goal ban a pet per leh a - a vanneih zan a ni lo.

Vincent Kompany naute an chak tawh mai dawna a lan laiin Silva-a'n minute 89-naah an si phurh sutna goal a khung a, goal dang luhna hman a awm tawh loh avangin team pahnihten point an insem.