Lehkhabu bawm: Lehkhabu 'Lawm ve mai teh!' tlangzarh

Dr. C. Lalhrekima lehkhabu thar 'Lawm ve mai teh!' chu nizan khan Chawlhhmun Pastor Bial vawngtu Rev. Malsawmtluanga’n Pathian hnena hlanna hun hmangin, a duh apiangte lei theih turin a tlangzarh. He lehkhabu chhuahtu hi Kristian Ṭhalai Pawl, Chawlhhmun Branch-te an ni a, Fraser Media & Publication-a print a ni.

'Thurûk 90' (2009), 'A ho tlat!' (2018) leh 'I thu ber lo' (2023) te lo hlawhtlinpuitu Dr Hrekima hian a lehkhabu dangte ang thoin he a lehkhabu thar hi hralh a kal leh hle tura beisei a ni. He lehkhabu tharah hian thupui ngaihnawm tak tak 73 awmin; chhiartute sawtpui tur hringnun chhungril, Pathian nena kan inkar leh chhungkaw inlaichinna thu hrang hrang dah khawm a ni. Ruihhlo avanga harsatna tawk mekte leh a enkawltute tan pawha chhiar manhla tak tak thu eng emaw zat dah a ni bawk.

He lehkhabu hi Rs. 350/- man chauh niin lehkhabu dawr hrang hrangah lei theihin a awm thuai ang. A hlawma la duh tan a chhuahtu Chawlhhmun Branch KṬP te biak mai tur a ni e.