Ṭhazual Award 2019 zaninah sem dawn

Zonet Cable TV Pvt. Ltd. buatsaih Ṭhazual Award 2019 chu zanin hian Dawrpui Multipurpose Hall-ah sem a ni dawn a, he hunah hian mit leh beng a tlai dawn.

Zanina Ṭhazual Award sem tur hi a ṭum ngana a ni dawn a, nominee-te an ṭha hlawmin an inbuktawk tlang bawka, award dawngtu turte pawh hriat a chakawm tawh hle. Mizo zaithiamte tana award ngaihhlut ber zinga mi Ṭhazual Award buatsaihtute pawh an inbuatsaih nasa hle a, mit leh beng a tlai dawn hle a ni. 

Dar 6:30-ah red carpet ṭan a ni anga, programme tak erawh chu dar 8-ah ṭan a ni thung ang. Zonet Zawlbuk HD leh Zonet YouTube channel-ahte live-in pekchhuak a ni dawn bawk. A hmunah mi tam tak an leng lo tih Zonet chuan hriain mi tam zawkin an en theihna turin heng channel tarlanahte hian live-in an pechhuak dawn a ni.

Zonet Cable TV Pvt. Ltd hian kum 2015 aṭang khan Music Domain Mizoram Artist-te tan Ṭhazual Award hi a buatsaih ṭan a, kumtin neih chhunzawmin kumin hi a ṭum ngana tur a ni tawh a, kum tinin hluttu pawh an pung zel bawk.

Zaithiam perform tur an hrawl a, hei hi Ṭhazual Award 2019 ti hmuhnawm tu tur a ni. Nikum lam han thlir let lawk ila, nikum khan Jaui leh Feli Fanai-te an hmuhnawm a, Kimkima leh K. Hminga perform dunte pawh khan show a ti hlu hle a nih kha. Jaui'n 'A pawi love' a thlawh fuhin a performance hmuhnawm zia chu YouTube-a a viewer a ngah dan aṭang pawhin a teh theih awm e. Jaui hi kuminah hian a perform leh dawn a, a hmunawm leh dawn tih a chiang. A hla thar a sa dawn a, kan la hriat ngai loh hla a rawn vawrh dawn a nih hmel.

Josephine Lalawmpuii perform kan hmu dawn bawk a, Ṭhazual lengzem chart hnuhnung bera pakhatna dinhmun hauhtu Essy a perform dawn bawk. Chumai a la ni lo, Zorinzuali Khiangte leh Manuna-te zai pawh ngaihthlak tur a awm dawn. Sawi hmaih phal chi ni lo, Rpa Ralte leh G'nie-te an la zai dun cheu dawn. Music Video an siamdunna kha an rawn sa dawn nge hla dang an sa dawn tih chu zaninah a hriat dawn a ni. Seraphic Choir leh Priscilla Fanai-te an zai dawn bawk.

Lengzem lam chauh kan ngaithla dawn lo, Gospel artist-te pawh an che dawn- Hlimhlimi zai ngaihthlak tur a awm dawn a, Praise On star trio Arini, Cindy &Zorina-te an zai dawn bawk. Anni hian Pu RK Lianzuala pualin hla an sa dawn. Gospel rock band kan neih ṭhat ber zinga mi The Prophets-te an che dawn a, nomination pahnih hmu thei Maruati a la zai dawn cheu bawk. A high school kal lai aṭang tawha zaithiam hriat hlawh tawh, Fiona Pachuau pawh a zai dawn a ni.

Ṭhazual Award hi fashion event lian tak a ni nghal a, zaithiamte hian Mizo designer larte kutchhuak an inbel dawn tih a chiang tawh a, hei ringawt pawh hi mi tam tak tan chuan nghahhlelhna tham a tling ngei ang. Buanga Chhangte, Escape Engmawia, Christine V, Nene LE Hnamte, Emy T, Queen Bee, Rini Hlondo, Grace OP,  Sawngboihi, Achhani Innovative Dresses, POZ, Teremi Ralte, Tluangpui Hmar, Rempuiii Hmar, Hillside, Angu VHL leh Mapuii Hlawndo-te kutchhuak an rawn pholang dawn a, zaithiamte hmuh an nuam dawn tih a chiang.