Minister hoin Dungtlangah Vângpui Kût

Dungtlang khua chuan nimin khan an khaw Zokhuaah Vângpui Kût an hmang a, minister Lalthansanga'n a hmanpui. Dungtlang hian kum 1986 aṭangin Vângpui Kût an hmang a, kumin hi vawi 40-na niin, Dungtlanga sikul hrang hranga zirlaite'n hnam lâmte an entir.

Lalthansanga chuan, Dungtlang chu Mizo pi leh pute hun aṭanga khaw ropui leh lâr a nih thu sawiin, "Dungtlang hi tun aia nasa zawkin chawi sànin awm se, a khaw thleng mawina, pi leh pute sûlhnu hmuh tur la awmte avang hian kawng hrang hrangin a khaw mite tan eizawnna thlentu lo ni thei se ka duh hle a ni," a ti.

Hmasawnna hrang hrangin Mizoram a tuam mek tih sawiin Minister chuan, "Kan ram mawina, kan hnam nun ziarângte en tur ringawtin mi nuai tél Zoram páwn aṭangin an rawn kal chho mek a, kan pi leh pute sûlhnu leh hmun hlui he lam tlangdunga awmte hian khualzin nasa takin a hîp chho mek a ni," a ti a; Mizo zingah pawh pi leh pute sûlhnu ngaihhlut nachang hria an pung mek thu a sawi.

Lalthansanga chuan, kum 1986 aṭanga Vangpui Kût hman a ni chu ṭha a tih thu sawiin, "Kan pi leh pute sûlhnute vawng ṭha zel chunga Dungtlang leh a chhehvel hi tlawh châkawm a kan siam a, ngaihtuahna zau zawk kan senho te, khawtual mite'n eizawnna ṭha leh hlâwk zawk awm thei turte ngaihtuahhoa tihpuitlin dan dap a ngai a ni," a ti.

Sericulture minister Lalthan-sanga chuan, Dungtlang khaw-tlang hruaitute nen inberáwnin, Dungtlang leh a chhehvel tan seri-tourism lam hawiin, awmze nei zawka sericulture lamah kalphung thara eizawnna siam a châkawm a tih thu a sawi a; sericulture lam hawia ngaih-tuahna séng turin Dungtlang leh a chhehvel khaw mipui a chah.

Vângpui Kûtah hian bialtu MLA Ramthanmawia chu kût thlengtu a ni a, Aizawl Electric Veng Branch YMA president C Lalrinfela khualzahawm niin, Dr C Lalrammawia khualṭha a ni.