12th Ṭhazual Awards: Best Male/Female Artist Gospel nominee-te an duai lo

12th Ṭhazual Awards, November 13-a sem tura Gospel huanga category dahsan, 'Best Male/Femnale Artist' nominee te an duai lo leh hle. He category-a artist insu turte hi dawng awm leh phu tak vek an ni a, a dawng tur pawh rin thiam a la harsa hle.

Gospel huanga Best Male Artist category-ah artist ṭha rual leh thawm nei lian Zorema Khiangte, J. Lalrosanga, Isaac Hnamte, Samuel Lalmuanchhana, leh Lalthlanawma te an awm a, kumin chhunga mipa gospel artist ṭha ber hriat a chakawm tawh hle a ni. Hmeichhe lamah pawh an zaithiam zia sawi nawn ngai lo vek, Cindy Lalthanpuii, Lalduhsaki, Maruati Hnamte, Christina Vanlalnghaki leh Laldinsangi-te an insu dawn a, pakhat chauh thlan a ngai dawn si a, thlangtute tan pawh lu a hai duh khawp ang.

Mipa lamah tunge dawng thei ang?

Mipa nominee-te hi Ṭhazual Awards-a nomination lo hmu fo tawh, rinkai ṭhah an ni. Best Male artist category a insu tur zingah J. Lalrosang hi nikum lama Lengzem huanga Best Male artist dawngtu kha a nia, Gospel huanga a inleh hnuah pawh artist thawm lian zingah a la tel pha cheu. Zorema Khiangte pawh nikuma he award dawngtu a ni a, a dawng leh thei a nih chuan TBC Zaithanpuia dawta a zawna he category-a award dawng thei pahnihna a ni thei nghal dawn.

Isaac Hnamte pawh nomination-a lo lang fo tawh ṭhin a ni a, kumin hian he award hi a hum haw thei tawh angem tih chu hriat chakawm tawh tak a ni. Praise On 2024 Top 3 zinga mi, Lalthlanawma leh Samuel Lalmuanchhana te kan hmu thar a, Praise On aṭanga zaithiam rawn chhuak thar mipa zingah he award dawng thei hmasa ber nih theihna chance an nei ve ve dawn a ni.

Hmeichhe lam dawng tur rin thiam a har!

Hmeichhe lamah pawh thawm nei lian ṭhah an insu dawn a, an zingah he award lo dawng tawh pahnih Maruati Hnamte leh Cindy Lalthanpuii-te an tel. Cindy-i hi kum 2017-a Best New Artist lo dawng tawh niin, he award hi a dawng a nih chuan Ṭhazual Awards vawi thum a dawnna a ni dawn. Maruati pawh 2019, 2020, leh 2021-te a he category-a zawna vawi thum award la thei a ni a, a dawng nawn leh lo ang tih sawi theih a ni lo.

Gospel artist kan neih ṭhat ber ber - Lalduhsaki, Christina Vanlalnghaki leh Champhai nula Laldinsangite an awm bawk a, anni pathum pawh hi dawng awm hliah hliahte an ni bawk. Laldinsangi hi kum 2024 kuma Best New Artist (Gospel) dawngtu a ni a, Best Female Artist ni thei dinhmunah a ding mek., Lalduhsaki leh Christina-i te erawh nomination lo hmu ve tawh ṭhin mah se award an la dawng lo a, kumin hi an dawn kum a ni thei reng.