Ṭhazual Lengzem-ah Feli Fanai 'Chhingmittui' dang zo an awm lo

Chart-ah kan hmuhna a rei tawh a, chart thar tihchhuah a nih apiangin hma a sawn zel a, tunah chuan dinhmun ṭha berah a rawn ding ta. Feli Fanai 'Chhingmittui a hul zo ta' chu Ṭhazual chart-ah pakhatna a ni, a mak lo e.

Lyni Lalthanzuali hla Feli Fanai-in a rawn thar thawh leh 'Chhingmittui a hul zo ta' hi tun hma deuha Lyni'n a sak ṭhin lai kha a hit ṭhin hle a, nikum kum chawhnu lamah khan Feli hian rawn thar thawh lehin a rawn hitpui lehnghal a ni.

Feli hian music video mawi tak nen a thar thawh leh a, a hla a nalha a sak hnehsawh piah lamah music video a hmuhnawm bawk a, YouTube lamah pawh thlirtu nuai ruk chuang lai an awm tawh. Ṭhazual chart roreltu a ni pawh hi thimak a ni lo khawp mai.

Tunhmaa kan ngaihthlak ṭhin lo ang deuhin Feli hian ama version-in, tunlai ṭhalaite rilrem zawng tak turin a rawn herlum leh a, video director Escape Engmoia a ṭang bawk a, music video thlir manhla tak a ni. Lengzem artist kan neih zinga kum eng emaw zat chhung chu huhang ngah ber zinga tel tawh Feli hi a chuai mai dawn lo niin a lang a, hla thar pawh min la hlui leh thuaiin a rinawm.

Jaui chuan chart hmasaah khan a hla 'I Hlutna' chu pangana a nihpui a, tun chart-ah erawh pahnihnaah a rawn invawrh. A dinhmun a sawh nghet zel a, a hmabak a eng sawt hle.

Awmtea Polymer ft. Ramrami 'Hnungtawlh suh' chu top 3-ah rawn inhlangkaiin pathumna a ni a, Essy ft. JT Production 'Min ui lo mi' chu palina a ni. Ngurthansanga chuan Chalmar Zai hmangin top 5 a rawn khar a ni.

Tunṭum Ṭhazual chart-a langte hi an ṭha hle a, Zoram dung leh vanga hriat hlawh tak takte an ni hlawm. Rachel Lalnunkimi 'Di ṭhen lungleng' chu parukna a ni a, Zorinzuali Khiangte 'O' chu pasarihna a ni bawk. Anni bakah hian Keimah Senes, Tlangval Tlumtea ft. Lil Me, Mabiaki Pachuau leh Rebecca Lallawmsangi te pawh an la lang bawk a ni.