Kum 2021 V-Day pualin Grace 10:45

Kum thum vel liam taa 'No Khat' tih hla hmanga Zofate min awitu, Mizoin blues singer hmeichhia kan neih tlemte zinga mi Grace 10:45 chuan Valentine's Day pualin hla thar 'Kumtluangin' a tichhuak dawn.

Valentine's Day chu thla leh daih la ni mah se kumin V-Day chu Grace 10:45 hla ngaithla pah hian duhtakte nen a hman theih dawn a, zanin hian Zonet-ah he hla hi a tichhuak dawn. MDM Library lamah 'Kumtluangin' hi dah luh a ni tawh bawk.

He project hi nikum lam aṭanga a buaipui tawh kha a ni a, nikum September thla velah khan teaser a tichhuak daih tawh a, rei tak a zai ngainatute a nghahtir hnuah Zofate ngaihthlak turin min rawn hlui dawn ta a ni.

Mizo blues musician lar leh kuthnu mawi tak, K. Hminga nen he hlaah hian an thawkdun lehnghal a, K. Hminga hian music a siam sak a ni. A mawi lo thiang lo. A teaser-ah pawh a introduction music ringawt pawhin beng a verh nghal zar a nih kha.

'Kumtluangin' hi 'A Tunlai Classic Raih' tiin a sawi theih a, a music mil tak music video kan hmu dawn bawk. Samuel Liansanga chu music video-a choreographer a ni a, Cassettes leh Kimkima-te music video siam sak ṭhintu Reuben Lalmalsawma music video direct a ni bawk a, mit a tlai dawn tih a hriat. Dance move dangdai tak tak kan hmu dawn a nih hmel. Wardrope chu Mesz Khiangte & Blings niin Hair and makeup chu Zami Chhakchhuak a ni thung.

'Kumtluangin' hi amah Grace-i phuah a ni nghe nghe a, ani hian ama hla phuah hlir a la tichhuak a ni. Karleh lamah ama YouTube channel lamah thlira ngaihthlak theihin a awm dawn bawk.