Zoen Mizo Voice-ah Top 10 an duai lo

Zoen Lungleiin malzai intihsiak a buatsaih, Mizo Voice season 1 Top 10 intihsiakna chu November 10, Thawhlehni zan khan UPC Multi-Purpose Centre, Farm Veng, Lunglei-ah neih a ni. Top 10 aṭang hian Top 7 thlan a ni leh dawn a, Top 7 a tlingte hi November 14 Inrinni zanah an intihsiak leh ang.

Mizo Voice-ah hian zaithiam, theihna nei ṭha tak tak kan hmu thar a, ngaihlutu leh ngaihventu pawh an ṭhahnem hle. Top 10 te hi hla pahnih hmangin an intihsiak a, anmahni hla thlan leh organizing committee te hla thlansa pahnih 'Zo nun Mawi' Zirsangzela phuah leh 'Aw Zoram nuam suihlung phang lo la' tih hla PC Lalṭhakima phuah aṭangin an duh zawk an sa a ni.

Top 10-te hi Zoen social media platform hrang hrangah dah chhuakin, belhkhawma 'like' hmu tam ber chuan Top 7 hi direct-in a lut dawn a, November 13 zan dar 8:00-ah vote khar a ni ang. Top 7 te hi hla pahnih hmang bawkin an inel leh dawn a, anmahni thlan leh organizing lamin an thlan, 'Ngaihzual nang nen' 'Aw vala vala' leh 'Zuapa a rui e' tih aṭanga an duh ber an thlang leh ang.