
12th Ṭhazual Awards: Award pahnih dawng thei artist pathum awm!

Zonet buatsaih 12th Ṭhazual Awards chu November 13, Zirtawpni zan khan sem niin, award pakhat ai tam dawng thei mi pathum an awm. Awards ceremony hi Dawrpui Multi-Purpose Hall-ah host Tetei kaihhruaina hnuaiah hlawhtling taka neih niin, performer ṭha tak tak che tla chuan mit leh beng a titlai leh hle.
Rin lawkte an che ṭha
Kumin Ṭhazual Awards-a artist che ṭha tura rin kai, Mendal leh David Darlong te rin lawk ang ngeiin an che ṭha. Lengzem huanga category hrang hranga nominee-te an duai lo hlawm hle a; mahse, artist ṭha tak tak zingah hian David Darlong leh Mendal-te chu nikum October leh kumin Septemer inkar chhunga hla tichhuak zinga che ṭha ber an ni thei.
David Darlong hian Lengzem huangah a hla hit 'A liampui ngei ang' 'I liam ta maw', 'Vanglai Hringnun' leh 'Damchhan' hlate a tihchhuah hmangin 'Best Male Artist' a dawng. Hei bakah category zinga huam zau ber, Gospel leh Lengzem huang khata awmna 'Best Music Video' chu 'A liampui ngei ang' tih hmangin a dawng thei bawk. He hla hi 'Song of the Year' ah nominate ni bawkin he category-a hla pahnih lanpui thei Mendal 'Hmelṭhanu' a ngam ta lo thung. Mendal pawh David Darlong ang bawka category pathuma nomination hmu thei niin 'Best Pop Artist'leh 'Song of the Year' a hum haw thei ve bawk. Bzi Tochhawng hnenah 'Best Female Artist' hlan a ni a, a phu hle.
Gospel huangah Cindy Lalthanpuii a che ṭha a, Lalnunpuia Hrahsel pawhin a hla hrang hrang dahkhawmna album 'Thinlung Chabi' album a chet ṭhatpui hle bawk. Cindy hi Gospel artist zinga award la hnem ber niin 'Best Female Artist' a lak bakah, Lalnunpuia Hrahsel hla 'A awm e' tih a sak hmangin 'Song of the Year' a la tel a, nominee a nihna category pahnih aṭangin award a dawng thei ve ve a ni. Super Trio thar -Jonathan Lianhna, Zorema Khiangte, leh Uncle Joe te chuan 'Best Duo/Group' chu a zawna a vawi hnihna atan an dawng leh bawk.
Best New Artist-ah Mizo Idol star an che ṭha a, Lengzem lamah Mizo Idol Emmanuel Lalremruata'n a dawng a, Gospel lamah Vanlalneihpuii hnenah hlan a ni bawk.
Stage a mawi, artist-ten mipui an ṭhap ṭha

Kumtinin Ṭhazual Awards stage mawi ziain sawi a hlawh ziah a, kuminah pawh a mawi leh hle. Stage tunlai leh changkang taka kan artist neih ṭhatte che tla chuan lung a dum tak zet a, an theihna ṭha tak tilang chiang zual tura stage arrangement fuh tak , lighting leh a behbawm hrang hrangte sawi hmaih chi a ni lo.
Opening act-ah Gospel artist ṭha, 'Best Male' leh 'Female Artist' dawngtu pahnih Isaac Hnamte leh Cindy-i ten show khuh hawngin Hall chhung thawm a ṭha nghal hle a, an zai mawi tak chawih taka lamthiam lamten mit an titlai a, show tihlawhtlingtu zinga mi an ni. Project Wallflower pawh an tihdan ngai te tein beng fah zet maiin an rawn zai thei bawk.
Lil Kiki leh Rebbecca-i ten mipui an ṭhap ṭha hle. An nupa thawh dunna 'Sangfal' leh Lil Kiki hla 'Ka khua har lo' tih an remix a, choir-in an zai rawn puiin mipui an 'surprise' a, thawm pawh a ring. Ṭhazual Awards kaltlanga solo debut performance nei, Hriati Sailo sawi nep theih a ni lo, J&J tia kan hriat lar ṭhin, J. Lalremruati leh J. Lalthlengliana te hla 'Tlai khua ka var' tih chu ama mil tur Symphonic metal leh dark lampanga siam remin mawi leh cial em ema rawn thlawhin, a performance pawh band anga a perform-na aiin mit a titlai zawk.
Engnge an sawi ?
Best Music Video dawngtu David Darlong chuan a dawnna hla 'A liampui ngei ang' tih a phuah chhuahna chhan ngei hnenah amah vang a nih thu sawi langin lawmthu a hrilh nghal. Ṭhazual Awards-a solo anga rawn debut, Hriati Sailo pawhin a band Velkynara te puihna, House Band leh Dancer-te zara debut performance ṭha tak a neih theih avangin a lawm hle tih Vanglaini a hrilh.
'A awm e' tih phuahtu, Gospel huanga 'Song of the Year' dawngtu Lalnunpuia Hrahsel chuan mite harsatna leh buainate a hriatin chung zawng zawng chinfelna chu Isua-ah a awm tih hriain he hla hi a phuah tih Vanglaini a hrilh. Kum 2020 Ṭhazual Awards-ah khan a hla vek, 'Ka thinlungah a nung' tih H. Lalremruati sak chu 'Song of the Year' atana thlan a lo ni tawh a ni.