Youth Icon 2026 3rd Round zaninah ṭan dawn

LPS Vision Production buatsaih EverHome Youth Icon 2026 neih mekah Third round intihsiakna hmachhawn turin mi 27 thlan chhuah an ni. Zanin leh naktuk zanah intihsiakna hi neih a ni dawn a; zaninah mi 14 inlanin, naktuk zanah mi 13 ten inelna an hmachhawn ve leh ang.

Third Round-ah hian Mizo hla pakhat, a tluanin sak phal a ni a, musical instruments: Acoustic guitar / Electric Bass/ Cajon / Keyboard chhawp chhuah a ni tawh dawn a, musical instrument hi mahni duh zat a hman theih dawn bawk. November 19,2026-ah result puan tum niin, mi 27 aṭang hian Top 10 thlan chhuah an ni ang.

Top 10-ah hian hlankai tawh sa mi pakhat a awm a, hei hi Judge ten top 10-a mi pakhat hlan kai theihna ticket pakhat 'Ticket to Arena' an neih aṭanga tling a ni. He ticket hi Second Round intihsiakna zan tawp berah hmangin Andrew Lallawmzuala, Falkland, Aizawl chu top 10 ah an hlangkai.

Third Round-a tling zingah Aizawl district tam berin 8 an awm a, Lunglei district aṭangin 6, Saitual district 3, Kolasib district 2 bakah Hnahthial, Serchhip, Siaha, Khawzawl leh Lawngtlai district aṭangin pakhat theuh an tling a, Mizoram pawn Manipur leh Assam atangin mi pakhat ve ve an tling bawk.