'GTA 6' in record siam nghal; Tlangzarh nia hralhna USD tld 2 tling

Khawvel huapa open-world action-adventure games ngahhlelh hlawh, 'Grand Theft Auto VI' (GTA 6) chu Ningani, November 19 khan khawvel pumah tlangzarh niin record thar a siam nghal. Analytic platform Sensor Tower tarlan danin GTA 6 hian tlangzarh ni hian USD tld 2.36 a hmu let nghal a, hei hi pre-order leh tlangzarh nia leina hrang hrangte aṭanga a hmuh chhuah a ni.

GTA 6 hi pre-order aṭang ringawt pawhin kumin chhunga games chhuak zinga hralh kal ber a ni thei nghal a, tlangzarh ni hian pre-order kaltlanga an hralhna bik hian USD tld 2 a tling tih market intelligence company SVP of Video Game Insights, Karl Kontus chuan a tarlang.

Sum deh chhuah mai bakah internet lama mitin mit fukna tih theih turin YouTube leh Twitch platform-a streamer-te aṭang ringawt pawhin ngaihventu a ngah thawkhat tih a hriat theih nghal. Internet exchange operator DE-CIX chuan tlangzarh a nih khan khawvel puma internet hmanna chu second khatah 33.03 terabits a tling tih tarlangin, tlangzarh hun laia internet hmanna chu 25% laiin a san phah bawk.

Kum 13 chhung teh meuh nghah a nih hnuah GTA 6 hi tlangzarh a ni a, game siamna atan hian USD tld 1 vel sen ral anga chhut niin, hei hi video game history-a games siamna senso tam ber a ni pha bawk. Sensor Tower-in a tarlan danin GTA 6 tlangzarh hian gamers zingah single player title game dang khelh nana hun hman chu 10% ngawta a tlakhniam tir phah tur thu an tarlang.