Margot Robbie-i'n Birds of Prey-a Joker inlan loh chhan a sawi

Batman hmelma lian ber Joker bialnu Harley Quinn solo movie Birds of Prey (and the Fantabulous Emancipation of One Harley Quinn)-ah Joker kan hmu dawn lo niin a lang a, hemi chungchangah hian a changtunu Margot Robbie chuan Jared Leto Joker inlan loh tur chhan a sawi chhuak.

"Harley leh Joker chanchin tawp a ni dawn a nih loh chuan Joker tihlan loh law law kha a ṭul a ni. Harley-i girl gang zinga a chetla hmuh ka chak a, market (film market)-ah hian girl gang awmkhawmna action film hian hmunruak a nei zau hle niin ka hria. Miin chutiang film chu an siam duh lo niin ka hria a, a chhan pawh ka hrethiam bik lo, a bik takin comic book movie-ah," tia sawiin hmeichhe hlang chet tlatna a nih dawn avanga Joker chu inlan lo tur a nih thu a sawi.

Birds of Prey-ah hian Robbie hi a changtunu a ni mai dawn lo a, producer a ni tel dawn bawk. Chumi a nih avang chuan a film kalhmang turah pawh hian nasa takin a inrawlh dawn tih a hriat theih.

Trailer aṭang pawhin hmeichhe hlang chetla kan hmu dawn tih a hriat a, film star lar tak Mary Elizabeth Winstead leh Jurnee Smollett-Bell-te pawh an inlan dawn a ni.

DC fan tam tak chuan tattoo nalh tak tak nena Jared Leto inlan lehte pawh an hmu chak ngei ang tih a rinawm, mahse kan hmu dawn ta lo niin a lang. Leto hian Joker lema chan leh hi a hreh loh thu pawh lo sawichhuak tawh mah se February 7-a tlangzarh tur Birds of Prey (and the Fantabulous Emancipation of One Harley Quinn)-ah hi chuan kan hmu dawn lo a nih hmel.