Bad Boys bawkin ro a rel e
Box Office-ah Bad Boys for Life bawkin ro a rel leh a, 1917 bawk pahnihna ni lehin Dolittle chu pathumna a ni ve leh bawk.
Danglam tam lo Box Office
Chart hmasa nena khaikhinin kar tawp Box Office-ah khan thil danglam liantham thleng a awm lo a, Top 3 chinah phei chuan film ngai vek, a indawt dan ngaiin an intlar thla leh.
Chutihlai erawh chuan Bad Boys for Life chuan $34,011,714 zet a la lalut phak. Khawvel pumah pawh $mtd 215.6 zet a ni tawh a, 2003-a tihchhuah Bad Boys II chhunzawmna kha ni chauh mah se Will Smith-te ṭhiandun chetla hi khawvel mipuiin an lo la en kham lo hle tih a hriat.
Indopui I-na hunlai behchhana film siam 1917 chu sum lalut tam ber dawttu a la ni bawk a, $15,916,580 a la lalut tling a, Box Office-a a rawn invawrh tirha a khingpui ber Star Wars: Episode IX - The Rise of Skywalker erawh pasarihnaah a awm daih tawh thung. 1917 hi a la hlawhtling zel a tih theih awm e.
Pathumnaah pawh a ngai bawk Dolittle chu a la awm. Robert Downey Jr channa Dolittle pawh hian theatre 4,155 aṭangin $12,198,835 a la lalut thei a ni.
Film thar pahnih
Box Office Top 10-ah film thar pahnih lang a awm a, The Gentlemen chu palina rawn ni nghalin $10,651,884 a lalut a ni. Matthew McConaughey channa action comedy film hi January 24 khan tlangzarh a ni a, global box office aṭangin $mtd 33 chuang a lalut tawh bawk.
Film thar The Turning chu paruknaah a awm ve bawk. Hei hi chu supernatural horror film a ni thung a, ramhuai film lam tuipuitute tana film hmuhnawm tak a ni ngei ang. Jumanji: The Next Level pawh panganaah a la awm ve bawk a ni.