Tim Tebow leh Demi-Leigh Nel-Peters an inhual

American football star Tim Tebow leh Miss Universe 2017, Demi-Leigh Nel-Peters-te chuan Nilaini khan an inhual thu an puang. Tim Tebow leh Demi-Leigh Nel-Peters-te hi Florida-a an private farm-ah an inhual a, Tebow-a'n inneih puia a sawmna hi Demi-Leigh Nel-Peters hian a 'yes' ta a ni. 

Kum 31 mi Tim Tebow leh South African model lar Demi-Leigh (23)-te hian nikum July thla khan an inzui thu an puang a, an chanchin hian ngaihven a hlawh hle a nih kha. Thla tam pawh a vei hmain an inhual thu an puang leh ta a, fan-te chu an phur tawh khawp ang le. Hetih lai hian an inneih hun tur erawh puanzar a la ni lo thung. 

Tim Tebow hian a bialnu duhtak Demi-Leigh hi ṭhingṭhi chhungin inhualna zungbun a bun tir a, "He zungbun hi nangmah anga sawiselbo lo ni mawlh rawhse," tiin thu a chham a ni. An inhualna zungbun hi a hlu thawkhat hle ang tih a rinawm. 

An inhual hnu hian South African singer Matthew Mole chuan an hla duh ber mai 'The Wedding Song' chu a sak sak a, an hlim dun hle a ni. 

Tim Tebow hian Florida-a an inhualna hun hmanpui tur hian Demi-Leigh chhungte chu South Africa aṭangin a rukin a lo hruai thleng diam a, Demi-Leigh pawh a barakhaih hle. Ama chhungkhat laina hnai zualte pawh a sawm bawk a, a nupui tur atana a duh ber tan hian a inpe zo hle. 

Philadelphia Eagles quarterback hlui Tim Tebow hi Miss Universe (2012) Olivia Culpo nen pawh an lo inzui tawh a, an chanchin hian sawi a hlawh hle a nih kha. Mahse an inzui aṭanga thla tam pawh a liam hmain, 2015 khan an inṭhen leh a ni.  

Hemi hnu hian Tim chuan, "Chhungkaw dinpui tur mi ka duh a, fanau neia hlim taka hun hman ka duh a ni. Ka duh ang mi ka hmuh hunah chuan kei aia hlim hi an awm tawh chuang lo ang," tiin a lo sawi tawh a, tunah chuan Demi-Leigh vangin khawvela mi hlim berte zinga a ni tawh ngei ang. 

Timothy Richard Tebow hi August 14, 1987 khan Makati, Philippines-ah a piang a, amah hi Kristian ṭha tak a ni. 

American Football-a mi hlawhtling berte zinga mi, piang­thar ṭha leh inkhelh dawna hmai an cheiran ṭhinah pawh Bible châng ngat tarlang ṭhin a ni. Philadelphia Eagles-a an quarterback ṭhin a ni a, US-ah chuan infiammi langsar leh ropui berte zinga mi a ni. A inkhelh dawn apiangin a ṭawngṭai ziah ṭhin a, Pathian duh loh zawng nia a ngaih chu a eizawnnain tuar dawn mah se kalsan mai ṭhin mi a ni. 

Miss Universe Olivia Culpo meuh pawhin mipat hmei­chhiatna hmang tura a thlêm thluk theih loh niin, 'Ṭhangthar Josefa' ti hial an sawi ṭhin a ni. Infiam mi a nih piah lamah khawvel hmun hrang hrangah Pathian thusawiin a fehchhuak ṭhin bawk. Florida-a thusawi a sawm ṭum phei chuan mi 20,000 chuang zet an pungkhawm a ni. Tim Tebow hi ṭanpui ngaite ṭanpui kawngah a thawh hlawk hle bawk a, US hmun hrang hrangah evangelist 40 chuang a châwm a ni. 

South African model chhe­lo tak mai Demi-Leigh Nel-Peters hi June 28, 1995 khan Sedgefield, Western Cape-ah a piang a, a pianpui hmeichhia chu pianphunga rualban lo a ni. Nel-Peters chuan a unaunu hian chona nasa tak a pek ṭhin thu leh, amah fuihtu ber pakhat a nih thu a sawi fo ṭhin. 

Kum 23 mi Nel-Peters hian South African 'Model and Beauty Pageant' title a lo la tawh a, Miss South Africa 2017 atan thlan a ni bawk. Hemi kum vek hian an ram aiawhin Miss Universe leh Miss World-ahte tel tura thlan a ni. Miss Universe 2017 atan hian thlan a ni zui a, Miss World-ah erawh a inlan lo a ni. 

Zirna lamah pawh a duai lo hle a, North-West University aṭanga business management degree nei ngat a ni.